திருவள்ளூர், மே. 22 –
தம்பட்டம் செய்திகளுக்காக மாறன்…
திருவள்ளூரில் சாலையோரம் நின்று கொண்டிருந்த தனியார் தொழிற்சாலை வேன் மீது பின்னால் வந்த மற்றொரு தொழிற்சாலை பேருந்து மோதிய விபத்தில் வேனில் இருந்த 12 பெண்கள் காயமடைந்தனர்.
திருவள்ளூர் மாவட்டம், மணவாள நகர் பகுதியில் இயங்கி வரும் பிரபல தனியார் தொழிற்சாலையில் பட்டரைப்பெருமந்தூர் பகுதியில் இருந்து சுமார் பத்துக்கும் மேற்பட்ட பெண்கள் பணிபுரிந்து வருகின்றனர்.
இந்நிலையில் அவர்களை ஏற்றி செல்ல பட்டரை பெருமந்தூர் பகுதியில் தனியார் தொழிற்சாலை வேன் வந்த போது சுமார் 12 க்கும் மேற்ப்பட்ட பெண்கள் வேனில் ஏறி அமர்ந்த நிலையில், ஆந்திர மாநிலம் நகரி பகுதியில் இருந்து வந்த மற்றொரு தனியார் தொழிற்சாலை பேருந்து நின்று கொண்டிருந்த வேனின் பின்பக்கத்தில் மோதியதில் வேனில் இருந்த பெண் தொழிலாளர்கள் காயமுற்று அலறி கூச்சலிடவே அப்பகுதியில் இருந்த மக்கள் அவர்களை மீட்டு திருவள்ளூர் அரசு மருத்துவ மனைக்கு அனுப்பி வைத்தனர்.
அத்தகவலறிந்து சம்பவ இடத்திற்கு வந்த திருவள்ளூர் தாலுகா காவல் துறையினர் தனியார் தொழிற்சாலை சேர்ந்த வேன் மற்றும் பேருந்து பறிமுதல் செய்து விபத்துக்கான காரணம் குறித்து விசாரணை செய்து வருகின்றனர்.
மேலும் நின்று கொண்டு இருந்த வேனின் மீது பேருந்து மோதி காயமடைந்த 12 பெண்கள் திருவள்ளூர் அரசு மருத்துவ மனையில் அனுமதிக்கப்பட்டு சிகிச்சை பெற்று வருகின்றனர். நல்வேளையாக பெண்கள் சிறு சிறு காயங்களோடு உயிர் தப்பினர்.
