ராமநாதபுரம், செப். 20-
ராமநாதபுரம் மாவட்டம் ராமநாதபுரம் கோ-ஆப்டெக்ஸ் விற்பனை நிலையத்தில் மாவட்ட ஆட்சித்தலைவர் வீரராகவ ராவ் தீபாவளி பண்டிகையை முன்னிட்டு சிறப்பு தள்ளுபடி விற்பனையை துவக்கி வைத்தார். கோ-ஆப்டெக்ஸ் விற்பனை நிலையத்தில் தீபாவளி சிறப்பு தள்ளுபடி விற்பனையை துவக்கி வைத்து விற்பனைக்காக வைக்கப்பட்டுள்ள ஆடை ரகங்களை பார்வையிட்ட பின் மாவட்ட ஆட்சித்தலைவர் வீரராகவ ராவ் தெரிவித்ததாவது: தமிழ்நாடு அரசு கைத்தறி ரகங்களின் விற்பனையை அதிகரிக்க ஆண்சடுதோறும் பண்டிகை காலங்களில் 30 சதவீத சிறப்பு தள்ளுபடி வழங்கி வருகிறது. அதனடிப்படையில் எதிர்வரும் தீபாவளி பண்டிகையை முன்னிட்டு கோ-ஆப்டெக்ஸ் விற்பனை நிலையத்தின் மூலம் பட்டு, பருத்தி, கைத்தறி ரகங்களுக்கு 30 சதவீத சிறப்பு தள்ளுபடி வழங்கப்படுகிறது. வாடிக்கையாளர்களை கவரும் வகையில் பலவித வண்ணம் மற்றும் வடிவமைப்புகளில் பருத்தி, பட்டு சேலைகள், படுக்கை விரிப்புகள் தலையணை உறைகள் விற்பனைக்காக வைக்கப்பட்டுள்ளன. மேலும், உடல்நலத்திற்கும் சுற்றுச்சூழலுக்கும் ஏற்ப ரசாயன உரங்கள் இல்லாமல் இயற்கை முறையில் விளைவிக்கப்பட்ட பருத்தியை கொண்டு இயற்கை சாயமிட்ட ஆர்கானிக் புடவை ரகங்கள் விற்பனைக்கு உள்ளது. மேலும், பாரம்பரிய ரகங்களை புதுப்பிக்கும் விதமாக கண்டாங்கி சேலைகள், செட்டிநாடு சேலைகள், கைத்தறி சுங்கிடி சேலைகள், மதுரை, தஞ்சாவூர் ஸ்லப் காட்டன் சேலைகள், ஈரோடு டிசைனர் போர்வைகள், பருத்தி மற்றும் பட்டு பரமக்குடி ஆயிரம் புட்டா சேலைகள் பண்டிகைக்காக தருவிக்கப்பட்டுள்ளன. மேலும், ஆடவர்களை கவரும் விதமாக லினன் சட்டைகள், லினன் பருத்தி சட்டைகள், பாலி விஸ்கோஸ் பேண்ட் கிளாத்கள் விற்பனைக்கு உள்ளன. ராமநாதபுரம் மாவட்டத்தில் கோ-ஆப்டெக்ஸ் நிறுவனத்தின் மூலம் ராமநாதபுரம், பரமக்குடி என இரு நகரங்களிலும் விற்பனை நிலையங்கள் செயல்பட்டு வருகின்றன. கடநவ்த ஆண்டு தீபவாளி விற்பனையின் மூலம் ராமநாதபுரம் விற்பனை நிலையத்தில் ரூ.64.07 லட்சம் மதிப்பிதல் கைத்தறி ஆடைகள் விற்பனை செய்யப்பட்டுள்ளன. இவ்வாண்டில் ரூ.80 லட்சம் மதிப்பில் கைத்தறி ஆடைகள் விற்பனை செய்திட வேண்டுமென இலக்கு நிர்ணயிக்கப்பட்டுள்ளது இவ்வாறு மாவட்ட ஆட்சித்தலைவர் தெரிவித்தார். இந்நிகழ்ச்சியில் கோ-ஆப்டெக்ஸ் மண்டல மேலாளர் நாகராஜன், வர்த்தக சங்க தலைவர் ஜெகதீசன், நிர்வாகக்குழு உறுப்பினர்கள் அய்யான், சங்கீதா, ரக மேலாளர் பாடலிங்கம், ராமநாதபுரம் விற்பனை நிலைய மேலாளர் பாண்டியம்மாள், உட்பட பலர் பங்கேற்றனர்.
